Kolposkopiya nədir?
Kolposkop uşaqlıq boynu xərçəngi və xərçəngönü xəstəliklərinin erkən aşkarlanmasında istifadə olunan optik cihazdır. Bu cihaz vasitəsilə aparılan müayinə isə kolposkopiya adlanır. Bu müayinəni aparmaqda məqsəd tək uşaqlıq boynunda olan patologiyaları təyin etmək deyil, eyni zamanda həmin patoloji nahiyyələrdən məqsədyönlü biopsiya almaqdır. Kolposkopun nəzarəti olmadan alınan biopsiyalarda yanlış nəticələrə çox rast gəlinir. Müayinəni aparmaqda üçüncü məqsəd isə aşkarlanmış xəstəliklərin müalicəsində taktikanı düzgün seçməkdir, yəni müalicəni konservativ və ya operativ yolla aparmaq haqqında qərar verməkdir.
Kolposkopiya müayinəsi ağrılıdırmı?
Bu müayinə qeyri-invaziv bir müayinə üsuludur və tamamilə ağrısızdır. Uşaqlıq boynuna sınaq qoyduqdan sonra obyekt bir neçə dəfə böyüdülür və məsafədən müayinə aparılır. Heç bir əlavə təsiri yoxdur və ziyansız müayinə üsuludur. Sadəcə kolposkopiya zamanı biopsiya götürməyə ehtiyac yaranarsa, bu zaman cuzi ağrı hiss oluna bilər.
Kolposkopiyada nələrə diqqət olunur?
Kolposkopiya menstruasiyadan öncə və ya sonra istənilən gün aparıla bilər, yalnız menstruasiya dövründə aparılması məsləhət görülmür. Bundan başqa kəskin infeksiya olarsa, öncə müalicə etmək, sonra müayinəni aparmaq lazımdır. Menopauza dövründə və ya ovarektomiya (yumurtalığın götürülməsi) əməliyyatı keçirmiş qadınlarda qadın hormonu olan estrogenin kəskin çatışmamazlığı fonunda uşaqlıq yolunda atrofiya yaranır ki, bu da müayinənin informativliyini azaldır. Belə vəziyyətlərdə bir ay müddətində yerli estrogen müalicə verilməli və sonra müayinə aparılmalıdır.
Kolposkopiyadan sonra nələrə diqqət etmək lazımdır?
Müayinədən sonra xəstədə adətən heç bir narahatçılıq müşahidə olunmur. Lakin kolposkopiya zamanı biopsiya götürülərsə, bu zaman bir sıra yan təsirlər yarana bilər. Biopsiyadan sonra ilk həftə ərzində xəstədə az ləkələnmə ola bilər, bu norma hesab edilir, lakin qanama olarsa və davam edərsə, bu zaman həkimə müraciət etmək lazımdır. Bundan başqa xoşa gəlməz ifrazat, ağrı, bədən hərarətinin yüksəlməsi müşahidə olunarsa bu haqda mütləq həkimə məlumat vermək lazımdır.